"വി.ടി. ഭട്ടതിരിപ്പാട് ഇരുപതാംനൂറ്റാണ്ടിന്റെ അന്തരീക്ഷത്തില്‍ പൊതു പ്രവര്‍ത്തന രംഗത്തേക്ക് ഇറങ്ങിയ പ്രമുഖ സാമൂഹിക പരിഷ്ക്കര്‍ത്താവും നാടകകൃത്തുമായിരുന്നു വി.ടി.ഭട്ടതിരിപ്പാട്. വെള്ളിത്തുരുത്തി താഴില്ലത്തു രാമന്‍ ഭട്ടതിരിപ്പാട് എന്നു മുഴുവന്‍ പേര്. 1896 മാര്‍ച്ചു മാസം 26-ാം തീയതി മലബാര്‍ പൊന്നാനി താലൂക്കില്‍ മേഴത്തൂരിലെ കൈപ്പിള്ളി മനയില്‍ തുപ്പന്‍ ഭട്ടതിരിപ്പാടിന്റെയും ശ്രീദേവി അന്തര്‍ജനത്തിന്റേയും മകനായി ജനിച്ചു. യോഗക്ഷേമ സഭയില്‍ ഉല്‍പ്പതിഷ്ണ വിഭാഗത്തെ നയിച്ചത് വി. ടി. യായിരുന്നു. കുടുമ മുറിക്കല്‍, അന്തര്‍ജ്ജനങ്ങളുടെ വേഷപരിഷ്ക്കരണം, വിധവാ വിവാഹം, വിജാതീയ ബന്ധ ബഹിഷ്ക്കരണം, മിശ്രഭോജനം തുടങ്ങി ഒട്ടനവധി വിപ്ലവകരമായ പ്രവര്‍ത്തനങ്ങള്‍ക്ക് അദ്ദേഹം നേതൃത്വം നല്‍കി. യോഗക്ഷേമസഭയുടെ ആപ്തവാക്യം ""നമ്പൂതിരിയെ മനുഷ്യനാക്കുക"" എന്നതായിരുന്നു. ആചാരങ്ങളുടെ ചങ്ങലയില്‍ പെട്ട് വീര്‍പ്പുമുട്ടിയ നമ്പൂതിരി സമുദായത്തിന്റെ കോട്ട തകര്‍ക്കുവാനുള്ള ആദ്യത്തെ ആറ്റം ബോംബെന്ന് വിശേഷിപ്പിക്കപ്പെട്ട 'അടുക്കളയില്‍ നിന്ന് അരങ്ങത്തേക്ക്' എന്ന നാടകം ഈ വിപ്ലവകാരിയുടെ തൂലികയില്‍ പിറക്കുന്നതും അക്കാലത്താണ് . വി. ടി. യുടെ പ്രധാന കൃതികള്‍ - രജനീരംഗം, കണ്ണീരും കിനാവും, കര്‍മ്മ വിപാകം, സത്യം എന്നത് ഇവിടെ മനുഷ്യനാകുന്നു, വെടിവെട്ടം, കാലത്തിന്റെ സാക്ഷി എന്നിവയാണ്. "