ചങ്ങമ്പുഴ കൃഷ്ണപിള്ളയുടെ ആ കുഗ്രാമത്തിൽ എന്ന കവിതയിലെ വരികളാണ് ഇവിടെ തന്നിരിക്കുന്നത്. മലയാളഭാഷയിലെ ഒരു മഹാകവിയാണ് ചങ്ങമ്പുഴ എന്നറിയപ്പെടുന്ന ചങ്ങമ്പുഴ കൃഷ്ണപിള്ള. കവിതാസമാഹാരങ്ങളും ഖണ്ഡകാവ്യങ്ങളും പരിഭാഷകളും നോവലും ഉൾപ്പെടെ അമ്പത്തിയേഴു കൃതികൾ ചങ്ങമ്പുഴ കൈരളിക്കു കാഴ്ചവച്ചിട്ടുണ്ട്‌. അതിമനോഹരങ്ങളായ കാവ്യങ്ങൾ കൊണ്ടുതന്നെയാവാം ജോസഫ് മുണ്ടശ്ശേരി അദ്ദേഹത്തെ 'നക്ഷത്രങ്ങളുടെ പ്രേമഭാജനം' എന്നു വിശേഷിപ്പിച്ചത്. ഒരിയ്ക്കലും തിരിച്ച് കിട്ടാത്ത സുന്ദരമായ ആ ബാല്യകാലത്തേക്കാണ് ഈ കവിത കൂട്ടി കൊണ്ടുപോയത്. ജനങ്ങള്‍ തൻ്റെ കോലാഹലങ്ങളാൽ അലമുറയിടാത്ത ശാന്താന്തരീക്ഷവും സമാധാന സങ്കേതകങ്ങള്‍ പോലെയുള്ള ഓലപ്പുരകളും ഗ്രാമത്തിൽ കാണാം. ഒരു പരിധിയില്ലാത്ത പരന്ന പചവിരിപ്പിട്ട പാടങ്ങളും അകലെയൊരു ചിത്രം വരച്ച പോലെ മിനുങ്ങുന്ന കുന്നിന്മുടികളും കാണാൻ സാധിക്കുന്നു. വിദ്യാർത്ഥി ജീവിതത്തിലെ മധുരമായ ഓർമ്മകൾ നെയ്തെടുത്ത് കൊണ്ട് കവി പറയുകയാണ്, ആ മംഗള സ്വപ്നമോര്‍ത്ത് ഇനി എന്തിനാണ് വിവശ ചിത്തനായ് വീര്‍പ്പിടുന്നത്. എനിക്ക് മറ്റൊന്നും ഇല്ലെങ്കിലും ആ മധുരമായ സ്മൃതി മാത്രം മതി ഇനിയുള്ള ജീവിത കാലം.