മലയാള സിനിമയുടെ ചരിത്രത്തിലെ ഏറ്റവും വിജയകരവും നിരൂപക പ്രശംസ നേടിയതുമായ ഗാനരചയിതാവായി വയലാർ രാമവർമ കണക്കാക്കപ്പെടുന്നു. രാമവർമ്മയുടെ ഒരു നാടകമാണ് "തലയ്ക്കു മീതേ ശൂന്യാകാശം". ഒരു കുഷ്ഠരോഗിയുടെ വേഷത്തില്‍ അഭിനയിക്കുന്ന കെ.എസ്. ജോര്‍ജിന്റെ ഒപ്പം സുലോചന, 'തലയ്ക്കു മീതെ ശൂന്യാകാശം... താഴെ മരുഭൂമി... ' പാടി അഭിനയിക്കുന്ന രംഗം മലയാളനാടകവേദിയിലെ അപൂര്‍വ മുഹൂര്‍ത്തമായി. യൗവനത്തിന്റെയും പ്രണയത്തിന്റെയും നിറവില്‍, വിവാഹസ്വപ്നങ്ങളുടെ സാക്ഷാത്ക്കാരത്തിന്റെ പടിവാതില്‍ക്കല്‍ എത്തുമ്പോഴാണ് സരോജം മഹാരോഗത്തിന്റെ നീരാളിപ്പിടുത്തത്തില്‍ അകപ്പെടുന്നത്. ആ വിവരം മറച്ചുവെക്കാന്‍ കൂട്ടാക്കാതെ അവള്‍ ചികിത്സക്ക് ഒരുങ്ങുന്നു. എന്നാല്‍ രോഗത്തില്‍ നിന്ന് പൂര്‍ണവിമുക്തി നേടി ആശുപത്രിയില്‍ നിന്ന് സന്തോഷത്തോടെ വീട്ടില്‍ തിരിച്ചെത്തുന്ന അവളെ ബന്ധുക്കളും കാമുകനും തിരസ്‌കരിക്കുന്നു. 'അഴലിന്‍ പഞ്ചാഗ്‌നി നടുവില്‍ അഞ്ചിന്ദ്രിയങ്ങളും പുകയുന്ന' അനുഭവവുമായി അരങ്ങത്തു നിറഞ്ഞു നില്‍ക്കുന്ന സരോജം - അവളുടെ ആഹ്ളാദവും ആഘാതവും രോഷവും സങ്കടങ്ങളുമെല്ലാം കാണികള്‍ അവരുടെ ആത്മാവിലേക്കു ഏറ്റുവാങ്ങി. അവള്‍ ചിരിച്ചപ്പോള്‍ അവര്‍ ഒപ്പം ചിരിച്ചു. കരഞ്ഞപ്പോള്‍ അവരും കൂടെ കരഞ്ഞു.