മലയാള സിനിമയുടെ നാഴികകല്ലെന്ന് വിശേഷിപ്പിക്കാവുന്ന ഐ വി ശശി സംവിധാനത്തിൽ മോഹൻലാൽ, രേവതി, ഇന്നസ്ന്റ് എന്നിവർ മുഖ്യ കഥാപാത്രങ്ങളായി അഭിനയിച്ച ദേവാസുരം എന്ന 1993'ൽ പുറത്തിറങ്ങിയ ചിത്രത്തിലെ ജനപ്രിയ ഗാനമാണ് "സൂര്യകിരീടം വീണുടഞ്ഞു". മംഗലശ്ശേരി നീലകണ്ഠൻ ദേവനായും അസുരനായും പകർന്നാടുന്ന ചിത്രം മലയാളസിനിമയുടെയും മോഹൻലാലിന്റെയും പകരം വെക്കാനാവാത്ത കഥാപാത്രമാണ്. അസുരനിൽ നിന്നും ദേവനിലേക്കുള്ള ദൂരമാണ് ഈ ഗാനം. ഗിരീഷ് പുത്തഞ്ചേരിയുടെ വരികൾക്ക് എം ജി രാധാകൃഷ്ണൻ ഈണം നൽകി അനിയൻ എം ജി ശ്രീകുമാർ പാടിയ ഗാനമാണിത്. നീലകണ്ഠൻ തന്റെ അമ്മയെ നഷ്ട്ടപ്പെട്ട സന്ദർഭത്തിലാണ് സിനിമയിൽ ഈ ഗാനം ചിത്രീകരിച്ചത്. അമ്മയോട് താൻ ചെയ്ത പാപങ്ങൾക്കുള്ള മാപ്പപേക്ഷയാണ് ഈ വരികളിലൂടെ. ചെഞ്ചുരുട്ടി രാഗത്തിലാണ് ഈ ഗാനം ചിട്ടപ്പെടുത്തിയിരിക്കുന്നത്.