സിംഹം ഉറങ്ങുന്ന കാടു (1982) എന്ന നാടകത്തിലെ ഒരു ഗാനമാണ് സിന്ധു ഗംഗാതടാകങ്ങളിൽ. കണിയാപുരം രാമചന്ദ്രൻ എഴുതിയ വരികൾക്ക് ജി ദേവരാജൻ മാസ്റ്ററാണ് സംഗീതം നൽകിയിരിക്കുന്നത്. കേരളത്തിന്റെ സാംസ്കാരിക-സാഹിത്യ രംഗങ്ങളിൽ നിർണായക സംഭാവനകൾ നൽകിയ സിപിഐ നേതാവും എഴുത്തുകാരനുമായിരുന്നു കണിയാപുരം രാമചന്ദ്രൻ. നാടകരംഗത്ത് പ്രവർത്തിച്ചു തുടങ്ങിയ കെ.പി.എ.സി. കണിയാപുരം രാമചന്ദ്രൻ 1966ൽ മാണിക്യകൊട്ടാരം എന്ന ചിത്രത്തിലെ വരികൾ രചിച്ചുകൊണ്ടാണ് ചലച്ചിത്രരംഗത്തേക്ക് കടന്നുവരുന്നത്. നാടകകൃത്ത്, ഗാനരചയിതാവ് എന്നീ നിലകളിൽ മലയാള നാടകരംഗത്ത് തന്റേതായ വ്യക്തിമുദ്ര പതിപ്പിച്ചിട്ടുണ്ട്. രാഷ്ട്രീയ നേതാവ് എന്നതിലുപരി പത്രപ്രവർത്തകൻ, നാടകകൃത്ത്, ഗാനരചയിതാവ്, ചലച്ചിത്ര തിരക്കഥാകൃത്ത് എന്നീ നിലകളിലും അദ്ദേഹം നിലകൊള്ളുന്നു. ‘മാണിക്യകൊട്ടാരം’ എന്ന ചിത്രത്തിലെ പച്ചമരക്കാടുകളേ എന്ന ഗാനം ചിട്ടപ്പെടുത്തിയാണ് കണിയാപുരത്തിന്റെ സിനിമാ അരങ്ങേറ്റം. തുടർന്ന് ഏഴ് സിനിമകൾക്കായി 26 ചലച്ചിത്രഗാനങ്ങൾ എഴുതി. ‘നാവടക്കൂ പണിയെടുക്കു’, ‘തൊഴിൽ അല്ലെങ്കിൽ ജയിൽ’ എന്നീ ചിത്രങ്ങൾക്കും തിരക്കഥയെഴുതി.