വി മധുസൂദനൻ നായരുടെ ബാലശാപങ്ങൾ എന്ന കവിതയാണ് ഇവിടെ കൊടുത്തിരിക്കുന്നത്. കവിതകള്‍ മധുരമായി പാടിക്കൊണ്ട് മലയാളികളെ പുളകമണിയിക്കുകയും ചിന്തോദ്ദീപകമായ കവിതകളെഴുതുകയും ചെയ്തിട്ടുള്ള മധുസൂദനന്‍ നായരുടെ ജന്മനാട് തിരുവനന്തപുരത്തിനടുത്തുള്ള നെയ്യാറ്റിന്‍കരയാണ്. അച്ഛനിൽ നിന്നും പഠിച്ച തോറ്റം പാട്ടിന്റെ ഈരടികൾ മധുസൂദനൻ നായരിൽ താളബോധവും കവിമനസും ചെറുപ്രായത്തിലേ ഊട്ടിയുറപ്പിച്ചു. കുഞ്ഞുങ്ങൾ ദൈവത്തിൻെറ ഓമനകൾ ആണ്. അവരുടെ ശാപം ദൈവശാപത്തിന് തുല്യമാണ്. ഈ കവിതയിലൂടെ ഒരു കുട്ടിയുടെ ശാപമാണ് കവി ആലപിച്ചിരിക്കുന്നത്. ഞാൻ കെട്ടിയ കളിവീട് എന്തിനാണ് നീ തകർത്തത് എന്നുപറഞ്ഞാണ് കവിത തുടങ്ങുന്നത്. ഇങ്ങനെ തുടങ്ങി കുറെ പരിഭവങ്ങൾ പറഞ്ഞതിനുശേഷം കവിതയിലൂടെ കുട്ടി ശപിക്കുന്നത് കാണാം. പ്രേതങ്ങൾ വന്നു നിന്നെ പേടിപ്പിക്കട്ടെ തുടങ്ങി കരിനാഗം നിൻറെ സ്വപ്നത്തിൽ കയറി നടക്കട്ടെ എന്നും കടുവകൾ നിന്നെ കീറി മുറിക്കട്ടെ എന്നും കുട്ടി ശപിക്കുന്നു. കളി മുറ്റത്ത് ആരും നിന്നെ കളിക്കാൻ കൂട്ടാതാവട്ടെ എന്നും നിൻറെ പുറത്ത് ആകാശം ഇടിഞ്ഞു പതിക്കട്ടെ എന്നും തുടരുന്നു കുട്ടിയുടെ ശാപവാക്കുകൾ.