മണവാട്ടി എന്ന സിനിമയിലെ വയലാർ രാമവർമയുടെ വരികൾക്ക് രേണുക ആലപിച്ച ഗാനമാണ് കാട്ടിലെ കുയിലിൻ കൂട്ടിൽ എന്ന് തുടങ്ങുന്ന ഗാനം. മലയാള സിനിമയിലെ ഒരു പിന്നണി ഗായികയാണ് രേണുക. കുട്ടികൾക്കു വേണ്ടി വളരെയധികം പാട്ടുകൾ പാടിയതിൽ, ഭാര്യ എന്ന സിനിമയിലെ പഞ്ചാര പാലു മിഠായി എന്ന ഗാനം പ്രശസ്തമാണ്. തങ്കമൂവീസിന്റെ ബാനറിൽ രാജു എം. മാത്തൻ അവതരിപ്പിച്ച മലയാളചലച്ചിത്രമാണ് മണവാട്ടി. ന്യൂട്ടോൺ സ്റ്റുഡിയോയിൽ നിർമിച്ച ഈചിത്രം 1964 ഏപ്രിൽ 10-ന് പ്രദർശിപ്പിക്കാൻ തുടങ്ങി. അശോക ഫിലിംസാണ് ചിത്രം വിതരണം ചെയ്തത്. മലയാളത്തിൽ ആദ്യമായി ഒരു വനിത തിരക്കഥ എഴുതുന്നത് ഈ ചിത്രത്തിനു വേണ്ടിയാണ്. ഹോം നേഴ്സായ സൂസി (രാഗിണി) കോൺവെന്റിൽ നിന്നും ബാബുവിനെ (മധു) ശുശ്രൂഷിക്കാൻ അയാളുടെ വീട്ടിലെത്തുമ്പോൾ പണ്ട് അവളെ ഉപേക്ഷിച്ച പോയ കാമുകൻ ജോസിന്റെ (സത്യൻ) വീടാണത് എന്നറിയുന്നു. ജോസിന്റെ അനുജനാണ് ബാബു എന്നും. മണവാട്ടി വേഷം ധരിക്കാൻ ആശിച്ച സൂസി ബാബുവിന്റെ അഭ്യർത്ഥന പ്രകാരം അയാളെ കല്യാണം കഴിക്കാൻ സമ്മതിക്കുന്നു. അവധിയ്ക്കു ഭാര്യക്കൊപ്പം വീട്ടിലെത്തിയ ജോസും സൂസിയും തമ്മിലുള്ള സംഭാഷണങ്ങൾ ഭാര്യ ഷീലയിൽ (കെ ആർ വിജയ) സംശയം ജനിപ്പിക്കുന്നു. ബാബുവിന്റെ അസുഖം ഒരു ഓപറേഷൻ കൊണ്ട് ഭേദമായെങ്കിലും അയാൾക്ക് വൈവാഹികജീവിതം നിഷിദ്ധമാണെന്നാണ് ഡോക്ടരുടെ തീർപ്പ് കൽ‌പ്പിക്കുന്നു. ഹതാശയായ സൂസി മണവാട്ടിവേഷം ധരിച്ച് തിരിച്ച് കോൺവെന്റിലേക്ക് യാത്രയാകുന്നു.