"പി. സുബ്രഹ്മണ്യം നിർമ്മിച്ച് ആന്റണി മിത്രദാസ് സംവിധാനം ചെയ്ത് 1955-ൽ പുറത്തിറങ്ങിയ മലയാളചലച്ചിത്രമാണ് ഹരിശ്ചന്ദ്ര. രാമായണത്തിലും മഹാഭാരതത്തിലും വിവരിക്കുന്ന ഹരിശ്ചന്ദ്ര രാജാവിന്റെ ഇതിഹാസത്തെ അടിസ്ഥാനമാക്കിയാണ് ചിത്രം നിർമ്മിച്ചത്. തിക്കുറിശ്ശി സുകുമാരൻ നായർ, മിസ് കുമാരി, മാസ്റ്റർ ഹരി, ജി കെ പിള്ള, ജോസ് പ്രകാശ്, ടി എസ് മുത്തയ്യ എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു, എൻ എസ് മണി ഛായാഗ്രഹണവും ബ്രദർ ലക്ഷ്മണൻ സംഗീതവും നിർവ്വഹിക്കുന്നു. ഇതിഹാസത്തിന്റെ ആദ്യ ചലച്ചിത്രാവിഷ്കാരമായ രാജാ ഹരിശ്ചന്ദ്ര (1913, ഹിന്ദി)യിൽ നിന്ന് പ്രചോദനം ഉൾക്കൊണ്ടതാണ് ഈ ചിത്രം. സത്യ ഹരിശ്ചന്ദ്ര (1943, കന്നഡ), ഹരിശ്ചന്ദ്ര (1945, തമിഴ്) എന്നിവയിൽ നിന്നും പ്രചോദനം ഉൾക്കൊണ്ടതാണ് ചിത്രം. ഈ സിനിമകളിൽ നിന്നുള്ള നിരവധി രംഗങ്ങൾ ഇതില്‍ നേരിട്ട് പുനരുപയോഗം ചെയ്തിട്ടുണ്ട്."