എബ്രായ ബൈബിളിന്റേയും ക്രിസ്ത്യാനികളുടെ പഴയനിയമത്തിന്റേയും ഭാഗമായ ഒരു ലഘുഗ്രന്ഥമാണ് ഹഗ്ഗായിയുടെ പുസ്തകം എന്ന പേരില്‍ അറിയപ്പെടുന്നത്. ദൈര്‍ഘ്യം കുറഞ്ഞ 12 പ്രവചനഗ്രന്ഥങ്ങള്‍ ചേര്‍ന്ന 'ചെറിയ പ്രവാചകന്മാര്‍' എന്ന വിഭാഗത്തിന്റെ ഭാഗമയാണ് ഇതു ബൈബിള്‍ സംഹിതകളില്‍ കാണപ്പെടുന്നത്. പേര്‍ഷ്യന്‍ വാഴ്ചക്കാലത്ത് ബാബിലോണിലെ പ്രവാസത്തില്‍ നിന്നു സെറുബ്ബാബേലിന്റെ നേതൃത്വ ത്തില്‍ ഇസ്രായേല്‍കാര്‍ യെരുഷമിലേക്കു മടങ്ങി വന്നിരുന്നു. ഇസ്രായേല്‍ക്കാരോട് നബുക്കദ്‌നസ്സറിന്റെ സൈന്യം നശിപ്പിച്ചിരുന്ന അവരുടെ പുരാതന ദേവാലയം പുനര്‍നിര്‍മ്മിക്കാനുള്ള ആഹ്വാനമാണ് ഈ കൃതിയിലൂടെ രചയിതാവ് പങ്കുവെക്കുന്നത്. പേര്‍ഷ്യന്‍ രാജാവായ ദാരിയസിന്റെ വാഴ്ചയുടെ രണ്ടാം വര്‍ഷം, ക്രി.മു. 520-ലെ മൂന്നു മാസങ്ങളാണ് ഇതിലെ ദര്‍ശനങ്ങളുടെ കാലമായി പറയപ്പെടുന്നത്. ദാരിയസ് ഒന്നാമന്‍, അഥവാ മഹാനായ ദാരിയസ് പേര്‍ഷ്യയിലെ ഒരു സൗരാഷ്ട്രീയന്‍ പേര്‍ഷ്യന്‍ ഷെഹന്‍ഷാ (ചക്രവര്‍ത്തി) ആയിരുന്നു. ചെറിയ പ്രവാചകന്മാരുടെ 12 ഗ്രന്ഥങ്ങളില്‍, കൃത്യമായ കാലസൂചനകള്‍ അടങ്ങുന്ന രണ്ടെണ്ണത്തില്‍ ഒന്ന് ഹഗ്ഗായി ആണ്. രണ്ടാമത്തേത് സഖറിയായുടെ പുസ്തകവും. ഈ രണ്ടു പ്രവാചകന്മാരും സമകാലീനരും സഹപ്രവര്‍ത്തകരും ആയിരുന്നുവെന്നതിന് എബ്രായബൈബിളില്‍ തന്നെയുള്ള എസ്രായുടെ പുസ്തകത്തിലാണ് സൂചന കൊടുത്തേക്കുന്നത്.