வாழ்க்கை எப்பொழுதும்-என்றும் அழகானது. நாம் சந்திக்கும் மனிதர்களும் அப்படியே! ஓர் சிறிய பட்டாம்பூச்சி, சுறுசுறுப்பான தேனீ, தான் இருப்பது ஆபத்தான காடு என்றாலும் மலர்ந்து சிரிக்கும் காட்டு பூக்கள், புதிய விஷயங்களை தேடித்தேடி பேரார்வத்துடன் கற்கும் சிறுவர், அதோ அப்பூங்காவில் கண்களில் ஒளி மிளிற தன் கடந்த காலத்தை விவரிக்கும் வயதானவர், காலை வேளையில் அத்தனை வேகமும்-நாளையின் நம்பிக்கையோடும் காய்கனிகள் விற்கும் பெண்மணி- இத்தனை விஷயங்களும் நமக்கு சொல்வது என்ன? வாழ்க்கை நமக்கு பலரை அறிமுகம் செய்கிறது. எல்லோரிடமும் ஏதோ ஒரு நல்ல நேர்மறையான தன்மை இருக்கவே செய்கிறது நாம் கற்க! இக்கவிதை வாயிலாக, மேரி ஆன் எவன்ஸ் பகிர்வதும் அதுவே. நம் வாழ்வின் இருண்ட நாட்கள் நம் பலத்தையும்-தைரியத்தையும் நமக்கே உணர்த்தும் கண்ணாடி! எச்சூழலிலும் விடாமுயற்சியும்-நம்பிக்கையும் கொண்டிருந்தால் வாழும் வாழ்க்கையே சொர்க்கமாகும். இவ்விளக்கக்காட்சி- ஒவ்வொரு மனிதரிடமும் நாம் நல்லதையே காணவும்- வாழ்வில் நம்பிக்கை கொள்ளவும், எதையும் எதிர்கொள்ளும் மனதிடம் கொண்டு நம் வாழ்வையும்-பிறர் வாழ்வையும் அர்த்தமுள்ளதாக்க அறிவுறுத்தும்- ஜார்ஜ் எலியட்டின் ‘மேக்கிங் லைஃப் வொர்த் வொய்ல்” கவிதை பகிர்வை விரிவாக விளக்குகிறது. அன்பு நெறியில் அறங்கள் வளர்த்திட-நல்லது நாட்டுக, தீமையை ஓட்டுக”- பாரதி!