ഉൽസവ ഗാനങ്ങൾ 1' എന്ന ആൽബത്തിലെ ഒരു ലളിതസംഗീതം ആണ് 'എൻ ഹൃദയപ്പൂത്താലം നിരയെ നിറയെ' എന്ന ഗാനം. ജാനകി ദേവിയാണ് ഈ ഗാനം പാടിയത്. ശ്രീകുമാരൻ തമ്പിയുടെ വരികൾക്ക് 'മധ്യമാവതി' രാഗത്തിൽ രവീന്ദ്രൻ മാസ്റ്ററാണ് സംഗീതം നൽകിയിരിക്കുന്നത്. രണ്ട് പ്രശസ്ത ഗാനങ്ങൾ കൊണ്ട് മാത്രം മലയാളികൾ ഓർത്തെടുത്ത ഗായികയാണ് ജാനകി ദേവി. കുട്ടിക്കാലം മുതലേ ജാനകീ ദേവിയെ അറിയാമായിരുന്ന ഗായകൻ ഉദയഭാനു ആണ് പിന്നണിഗാനരംഗത്തേക്ക് അവരെ കൊണ്ടു വരുന്നത്. 1983-ൽ തരംഗിണിയുടെ ഉൽസവഗാനങ്ങൾ ആൽബത്തിൽ ഈ ഗാനം ആലപിക്കാൻ യേശുദാസ് അവർക്ക് അവസരം നൽകി. ഈ ഗാനം ഗാനപ്രേമികളുടെ ശ്രദ്ധ പിടിച്ചുപറ്റി. കേരളത്തിൽ നിന്നുള്ള പ്രശസ്ത ദക്ഷിണേന്ത്യൻ സംഗീതസംവിധായകനും പിന്നണി ഗായകനുമായിരുന്നു രവീന്ദ്രൻ മാസ്റ്റർ. അദ്ദേഹത്തിന്റെ ചില ലൈറ്റ് മ്യൂസിക് ആൽബങ്ങളും ഭക്തിഗാന ആൽബങ്ങളും 1980-കളിലും 1990-കളിലും ഓൾ ഇന്ത്യ റേഡിയോയിലൂടെയും ഓഡിയോ കാസറ്റുകളിലൂടെയും ജനപ്രിയമായിരുന്നു, അതിൽ തരംഗിണിയുടെ ഉൽസവ ഗാനങ്ങൾ (1983, 1985) ഉൾപ്പെടുന്നു.