"കലൂർ ഡെന്നിസിന്റെ തിരക്കഥയിൽ ജോഷി സംവിധാനം ചെയ്ത 1983ൽ പുറത്തിറങ്ങിയ ആ രാത്രി എന്ന ചിത്രത്തിലെ ഗാനമാണ് ""ഈ നീലിമതൻ ചാരുതയിൽ നീന്തി വരൂ, തൂമഞ്ഞുതിരും മേഖലയിൽ പാറി വരൂ, കുളിരോളങ്ങൾ വീശുന്നോരോരങ്ങൾ തീരങ്ങൾ, പൂ കൊണ്ടു മൂടുമ്പോൾ എൻമോഹം പോലേ, ഈ നീലിമതൻ ചാരുതയിൽ നീന്തി വരൂ"". പൂവച്ചൽ ഖാദറുടെ വരികൾക്ക് സംഗീതസംവിധാനം ചെയ്തത് ഇളയരാജയാണ്. മനോഹരമായ ഈ ഗാനം ആലപിച്ചിരിക്കുന്നത് കെ ജെ യേശുദാസ്, എസ് ജാനകി എന്നിവർ ചേർന്നാണ്. ജൂബിലി പ്രൊഡക്ഷൻസിന്റെ ബാനറിൽ ജോയ് തോമസാണ് ഈ ചിത്രം നിർമിച്ചത്. മമ്മൂട്ടി, പൂർണ്ണിമ ജയറാം, രോഹിണി, എം ജി സോമൻ, ജഗതി ശ്രീകുമാർ, രതീഷ്, ലാലു അലക്സ്‌, കൊച്ചിൻ ഹനീഫ, സുകുമാരി, കവിയൂർ പൊന്നമ്മ തുടങ്ങിയവരാണ് ചിത്രത്തിൽ പ്രധാനവേഷങ്ങളിൽ എത്തിയത്. എന്‍ എ താരയാണ് ചിത്രത്തിന്റെ ഛായാഗ്രഹണം നിർവഹിച്ചത്. ചിത്രസംയോജനം കെ ശങ്കുണ്ണി. കിളിയേ കിളിയേ, കരയാനോ മിഴിനീരില്‍, മാരോത്സവം ഈ രാത്രിയിൽ എന്നിവയാണ് ഈ ചിത്രത്തിലെ മറ്റു ഗാനങ്ങൾ."