അയത്ന ലളിതവും ഭാവസുന്ദരവുമായ ആലാപനശൈലി കൊണ്ട് "ഭാവഗായകൻ" എന്നറിയപ്പെടുന്ന പി ജയചന്ദ്രന്റെ ശബ്ദത്തിൽ മലയാളികൾക്ക് ദക്ഷിണാമൂർത്തി സമ്മാനിച്ച ഗാനമാണ് ചന്ദനത്തിൽ കടഞ്ഞെടുത്തൊരു സുന്ദരി ശില്പം. മൂന്ന് മിനുറ്റ് മുപ്പത്തിയഞ്ചുസെക്കന്റ് ദൈർഘ്യമുള്ള ഗാനം രചിച്ചത് ശ്രീകുമാരൻ തമ്പിയാണ്.1973'ൽ പുറത്തിറങ്ങിയ എ ബി രാജ് സംവിധാനം ചെയ്ത ശാസ്ത്രം ജയിച്ചു മനുഷ്യൻ തോറ്റു എന്ന സിനിമയിലെ ഗാനമാണിത്. പ്രണയിനിയെ വർണ്ണിച്ചു പാടുന്ന ഒരു പ്രണയഗാനമാണിത്. ചന്ദനത്തിൽ കടഞ്ഞെടുത്ത ഒരു ശില്പത്തോട് തന്റെ പ്രണയിനിയെ ഉപമിച്ചു കൊണ്ടാണ് ഗാനം ആരംഭിക്കുന്നത്.