അഷ്ടമുടിക്കായലിലെ എന്നു തുടങ്ങുന്ന ഈ ഗാനം മധുര മനോഹരമായ ഒരു പ്രണയഗാനം ആണ്. കെ എസ് സേതുമാധവൻ സംവിധാനം ചെയ്ത മണവാട്ടി എന്ന ചിത്രത്തിൽ നിന്നുള്ളതാണ് ഈ ഗാനം. സുന്ദര സങ്കല്പമായ ജീവിത തീരത്തേക്കു മോഹ വഞ്ചി തുഴയുന്ന കമിതാക്കളെ ആണ് ഈ ഗാനത്തിൽ കാണാൻ കഴിയുന്നത്. വയലാറിൻറെ മനോഹരമായ രചനയും ദേവരാജൻ മാഷിൻറെ പ്രണയ സാന്ദ്രമായ ഈണവും ലളിതസുന്ദരമായ ഓർക്കസ്ട്രയും ആസ്വാദകരുടെ മനസ്സിൽ അവാച്യമായ പ്രണയാനുഭൂതി ഉണർത്തുന്ന ദാസേട്ടനും ലീലാമ്മ യും ആലപിച്ച ഗാനമാണ് ഇത്. വലിപ്പംകൊണ്ട് കേരളത്തിലെ രണ്ടാമത്തേതും ആഴമുള്ള നീർത്തട ആവാസവ്യവസ്ഥയുമുള്ള ഒരു കായലാണ്‌ കൊല്ലം ജില്ലയിലുള്ള അഷ്ടമുടിക്കായൽ. പനയാകൃതിയുള്ള ഈ വലിയ ജലസംഭരണി വലിപ്പത്തിൽ വേമ്പനാട് കായലിന്റെ തൊട്ടു പുറകിൽ സ്ഥാനമുറപ്പിക്കുന്നു. അഷ്ടമുടി എന്നതിന്റെ അർത്ഥം എട്ടു ശാഖകൾ എന്നാണ്‌. ഈ പേര്‌ കായലിന്റെ സ്ഥലചിത്രീകരണം സൂചിപ്പിക്കുന്നു;ബഹുശാഖകളുള്ള ഒരു കായൽ. കേരളത്തിലെ ശുദ്ധജലതടാകങ്ങളിലേക്കുള്ള കവാടം എന്നും ഈ കായലിനെ വിശേഷിപ്പിക്കുന്നു. കായലരികത്തായി താമസിക്കുന്ന ജനവിഭാഗങ്ങൾ മത്സ്യബന്ധനം,കയർ നിർമ്മാണത്തിലേക്കാവശ്യമായ ചകിരി വേർതിരിക്കുന്നതിനുള്ള ചകിരിപൂഴ്ത്തൽ,ഉൾനാടൻ ജലഗതാഗത സേവനം എന്നീ തൊഴിലുകളിലൂടെ ജീവിതോപാധി കണ്ടെത്തുന്നു.